Aaqqiissutissatsialak

Ajornartorsiutisi ajunngitsumik anigorniartarsigit
Aappariinnermi arlaatigut aporaaffiusinnaasut takkutinngitsoorneq ajorput. Tamanna ajortumik tigusariaqanngilarsi iluamik aaqqiiviginiarnissaat anguniarussiuk, soorlu kamannaveersaarlusi aammalu immissinnut tusaanniarlusi.

Paasinninneq oqaloqatigiilluarsinnaanerlu
Ammasumik unneqqarillusilu oqaluukkisi, taava paatsoornerit pinaveersaaruminarnerussapput. Immaqa ilaatigut qanoq misigisimanerlutit maluginiaqqaartariaqartassavat. Tamatumani aappassiat qalliunaveersaalaassaaq. Soorunalimi aamma taanna allatut iliuuseqarsinnaavoq. Attaveqatigiilluarneq oqaasiinnarmiinneq ajorpoq. Tusarnaarsinnaaneq pingaaruteqarluinnartuuvoq!

Piffissaqartigissi paasiniarlugu, aapparisarsi qanoq misigisimanersoq. Misiliguk taassumap inaanniikkuit qanoq issimassanersoq. Taava paaseqatigiinnissamut periarfissagissaarnerulerlusilu aaqqiissutissat nassaariuminartinnerussavasi.

Aaqqiissuteqarniarluni assortuunneq
”Siunertaqarluarluni assortuunneq” tassaavoq taannarpiaq pillugu oqallinneq, allat pisimasut akulerutinngivillugit taassuminngaannaq samminninneq. Taava aaqqiissutissamik nassaarnissaq ajornannginnerulissooq. Unikaallakkisi assortuunneq sakkortuallaalerpat. Kamaqarluni oqalunniarsarigaanni iluamik eqqarsarnissaq ajornarsinnaasarpoq.

Kamannerit aaqqiagiinnginnerillu aqunnissaat
Tamatta piffissap ilaanni kamattarpugut. Kisiannili kamariaasigut assigiinneq ajorput. Akuerineqanngisaannassooq kamak timikkut annersaanermik kinguneqartinneqarsimassappat!

Arlaatigut kamaleruit pingaaruteqarpoq oqaaseqannginnerni iliuuseqannginnernilu eqqarsarluarnissat. Kamassatit unitsinniarsinnaavatit ilummut anersaartorluarnikkut. Eqqissinissat tikillugu qulit tungaannut kisitsiguit pisuttualaarlutilluunniit.

Illit aappassiallu marluullusi ajornartorsiutisi aaqqiivigisinnaanngikkussigit, taava allanik oqaloqateqaritsi. Tarnip pissusaanik nakorsamik oqaloqateqarnissaq ajornanngippat periarfissaavoq.

Nalornisitsaaruk misiliguk – qanoq iliussavit?