Tatigeqatigiinneq naapeqatiginnissinnaanerlu

Kinaassutsit aalajangiusimagiuk, allalli aamma inissaqartikkit
Illit misigisimaguit ajunngitsumik ingerlallutit, ajornannginnerussaaq aappassiannik tatiginnillutit oqaloqatiginnissinnaanissat. Eqqaamajuk: Tamassi aappariinnermi inissaqartinneqartariaqarassi.

Ajunngitsumik misigisimaneq
Sulissutigiuk ineriartortillugulu misigissuseq pitsaasoq. Tamatuma inoqatinnut allanut attaveqarsinnaanerpit nakussassassavaa, aappassiarpillu qanoq iliuuseqarsinnaaneranut illit illersuutigissallugu.

Tatigeqatigiinneq unneqqarissuserlu
Tatiginninneq ilaatigut imatut isumaqarpoq illit aappassiarisat orniginartikkit aammalu taassumap killissarititai ataqqigitit. Tatiginninnerunngilaq aappassiarisani ingullugu oqalunneq imaluunniit pinngitsaalissallugu ajugaaniarfiginera.

Tatiginninneq isumaqarpoq immissinnut tatigisusi aammalu imminut toqqissisimanartittusi. Tatiginninneq aappariinnermi pingaaruteqartorujussuuvoq. Tatiginninnerusimassanngilaq aappassiarpit illit sunersutit nakkutiginiartuassappagu – imaluunniit illit taamaasioruit. Aapparisannut unneqqarittuaannarit. Tamannami tatigeqatigiinnissamut ingerlalluarnissamullu aqqutissaammat.

Inuttut pissuserisat naaperiaasinnaanerlu
Illit piumasatit tamatigut pisinnaanngilatit. Aappassiarpit oqaasii tusarnaakkit arlaatigullu naapigiarfeqarnissarsi anguniarsiuk ingammik isumaqatigiinngissimatillusi. Ajugaanniartoqaraangat tamatigut ajugaasoqarlunilu ajorsartoqartarpoq – tamannali aappariinnermut oqimaarsaataasarpoq.

Akerlianik tunniutiinnassanngilatit illit kinaassutsit pineqarsimappat! Kinaassusernut apeqqutaanngilaq aappaqarnersutit imaluunniit naamik.  Sunngiffimmi sammisartakkatit ikinngutitillu attattuaannakkit. Aappassiarpit soqutigisaminik aallussiuarnissaannik tapersersortaruk.