Ikiortissarsiorit

Qanoq iliuuseqarsinnaavunga?

Arlaatigut kanngunartumik annernartumilluunniit pineqarsimaguit , taava ajornartorsiut pillugu allamik oqaloqatiginnigit. Pingaaruteqarluinnarpoq allamik oqaloqateqarnissat – naak tamanna ajornaraluarpalluunniit.

Imaasinnaavoq aappassiarnit pineqarnerit pillugu illit kiserliortutit, kanngusuttutit paatsiveerusimaartutilluunniit. Imaassinnaavoq ikinngutitit takoqqusaajunnaarsimasut, aamma imaassinnaavoq illit imatut tatigitiginngikkitit aappassiat pillugu ajornartorsiutinnik oqaloqatigisinnaallugit.

Amerlasuutigut tarnikkut timikkullu anniartinneqarnerit isertuunneqartarput. Kisiannili tamakku nammineq isertuutiinnassallugit peqqinnanngilaq. Illit inuusariaqanngilatit ersillutit aammalu paatsiveerusimaartinneqarlutit.

Isumaqanngikkuit ilaquttatit ikinngutitilluunniit tamakku pillugit oqaluuserinnissinnaallutit, taava assersuutigalugu ikinngutivit angajoqqaavisa arlaat, ilinniartitsisut tatigisatit oqaloqatigisinnaavatit.