Sooruna qimanniarnissaq taamak ajornartigisartoq?

Nuanniitsumik timikkullu annersaaffiusartumi inuuneqaqataalersimaguit taasumap kipitinnissaa ajornaatsuinnaaneq ajorpoq. Pissutissat amerlaqaat. Ukuli nalinginnaasuupput:

Asanninneq neriunnerlu
Aappassiat asavat naak ilaatigut ilinnik pinnittarnera nuannersuinnaaneq ajoraluartoq. Aappaqarnerit aalajangiusimavat neriuutigigakku aappassiat allanngorumaartoq ilaatigut illit sukumiisumik suleqataanikkut.

Paatsiveerusimaarneq pisoqannginneraanerlu
Illit asanninneq nakkutilliinerlu ataatsimoortittoorpatit immikkoortissinnaannagillu. Aamma ingammik tamanna ajornakusoortissinnaavat ilaqutariinni timikkut attuiffiusartuni sumiginnaaffiusartunilu perornikuusimaguit. Annersaasoqartarnera soqutiginngitsuusaarpat eqqarsarlutillu ”sulimi ajornerusinnaagaluarpoq”.

Imminut pisuutinneq ersinerlu
Imaassinnaavoq isumaqartutit annersaasoqartarnera illit nammineq pisooqataaffigigit, tassami iliuuserisartakkat pillugit aappassiarpit pisuutittarmatit. Imaassinnaavoq kisimiilernissat ersigigit, aammalu aappariinnermi nuanniitsumiikkusunnerusutit.

Imminut tatiginnginneq allallu naqitsisarnerat
Nuanniitsut misigisisarsimasatit taakkua misigitilersinnaavaatit illit asaneqartariaqanngitsutit imaluunniit naammaannartuusutit. Aapparisat attatiinnarpat naak nuannaanngikkaluarlutit. Isumaqarputit taamatut asannittumik allamik nassaarsinnaanaviarnak. Taamaattumik aappariinnerup ingerlaannarnissaa orniginartinneruat.

Neriuutit piviusuunngitsut, aappassiarpillu neriorsuutipilui
Isumaqarputit annersaasarnera arlaatigut unikkumaartoq. Kisianni tamanna ajortoq imaasiinnarluni uninnaviarunanngilaq. Aappassiat utoqqatsertaraaq neriorsuillunilu taamatut pisoqaqqinnavianngitsoq. Tamannami aamma uppererusuppat, aappassiammi nuannarigakku. Ajortumik pinnittarnera unitsikkusuppat, aapparisallu annaarusunnagu.