Asavinga?

af: Rosine Kreutzmann

-    ’’Taamani ikiorakkit ikiorakkit naak illit tunniussatit?! Pakatsiseqaarma!!’’ Ane sapiillisaaqaluni nilliavoq.
-    ’’Tamakku eqqartornagit tujorminaqaaq, qangali neriartoqqusaanikuuvugut qaaniarit! Ata annunnak!’’ Aappaata akisaraa.

Minik siullinngorluni pisiniarfiup tungaanut ingerlasoq Anep malippaa, saneqqutani qissimiinnarlugit qungujulaarfigisarpai angutaasulli nalunngikkaangamigit qivianngilluinnaqqissaartarpai. Pisiniarfimmut iseramik Ane aappani maliinnarpaa baajamik tigusisoq, ornimmani Minik anersaaruluutigaluni isussuppoq:

’’Angutinuku kisimik baajatortartut ak aana hindbærissat!’’

Namminerlu baaja pissani tunniuppaa, peqqullugulu prinse qulit ilanngullugit akilissagai.

Miniup nalunngisaanut iseramik taava ilatik issaalersut. Minik aappani tunuanniit eqeqqavaa, aatsaallu ilatik issaareermata Ane malunnanngitsumik tunuaniit ajattarpaa issiavissaanullu ingitillugu. Akiminut ingitippaa angummillu sanileqartinnagu. Soorlumi ilaasa nalunngereeraat taamak inissiisoqassasoq. Nerinertik tamaat Miniup aappani qiviaqattaarpaa, sumut isiginera qanorlu isikkoqarneri tamaasa maluginiaqqissaarlugit. Nerritereeramik imerujuutigalutik pujortaallutillu inukkapput. Ane sivisulaamik oqanngilertorlu aappaata akianiit nissuminik isimmittarpaa qiimasaaqqullugu. Naalattaraarlu.

Læs kommentarer

Ane ittoortooriarami angummik naalaagaaniartumik ujarlersimavoq Minik-llu nassaaralugu. Anep Minik nuannaartikkumallugu nammineq nuannarinngisaminik iliortarpoq. Aappaminit aqunneqarpoq. Pingaarpoq Anep soqutigisani, inunnut attaveqarnini pisussaatitaaffinilu sianigeqqullugit. Suut pisiarissanerlugit nammineq naalagaavoq, aqunneqaranilu inuit allat ilagisinnaallugit.

Anep oqarasuaataa sianerpoq, aappani qiviariarlugu anartarfimmukarpoq taqqamanilu oqaluussilerluni. Sunaaffa ikinngutaa illoqarfimmiit allamiit sianertoq ikioqqulluni. Nipaarsaaqaluni oqaluuppaa, nalunnginnamiuk tusaatikkuni suutinneqarnaviarnani. Miniup aappani sivitsormat silataaniit tusaarnaarpaa, anartarfiullu matuata ataatsigut marsertarniarlugu.  Anartarfimmiillu anillammat toqqaannaq silamut ajattarpaa imminnukaallugulu.
Issiavimmut ingitippaa allunaasamik qilersorlugu. Seeqquni peqillugit talini nissuminut akimmisillugit isaatigut toqqarlugu:

-    ’’ASAVINGA?!’’
-    ’’Aappi..’’ Akiniariartoq talerpimminik isappaa. 
-    ‘’Soormi isortorfigaanga?’’

Suli issiasoq issiavik isimmippaa iikkamullu torlutserujussuarlugu. Allunaasaq peeriarlugu akiseq tigoriarlugu kiinaa asserpaa, timaatalu sinnera unatalerlugu. Isimmittarpaa qitserartorlugulu. Kiinaalu akitsimik pooqqasoq nikuiffigisarpaa pississaarfigalugulu. Naammatsikkami oqarfigaa:

’’Matuersaat qaaguk! Aniniarit angerlarsimaffinnut iseqqiaatsutit!’’

Sumummi ingerlassagami? Aqqutissaanik kiap siulersussagamiuk? Inuunerup qalipaataa sumiissagami? 

Imerniartarfiliarpoq. Bar-imut ingikkami ataaseq simeerpaa. Najorsilluni akimut qiviarluni takuaa angutip isigigaani. Najukkani ileriarlugu sanimut qiviariarluni angut saappaa qungujullugulu.  

Læs kommentarer

Sianerfigineqarnerata Minik sangiatsippaa qiningalersillugu, Anelu nakuuserfigalugu. Anep aqunneqarnissani ilikkarsimavaa, taamaammat Minik-p killeqanngitsumik pisussaafeqanngitsutullu pillugu. Ane imminut ataqqinngikkuni Minik-p ataqqinavianngilaa. Imaassinnaavorluunniit Minik imminut naleqartippallaanngitsoq. Kingunerisaanik Anep allalerinissaa annilaangagilerlugu, tatigalugu piguniuk.

Anep pisunik oqaluttuarfiginissaa qunugaa tatiginninnani saassussiinnassammat. Minik-p unatarpaa angerlarsimaffianiillu anisillugu. Aappariinneq isumaqanngilaq maleruutiinnarneq. Ikorfartoqatigiiffiussaarli soqutigisani kammalaatigisanilu. Nakuuserfigitikkaanni ikiortissarsiupallannissaq pingaarpoq, sakkortuppalli politiinut unnerluutiginninnissaq pitsaaneruvoq. Taamaalilluni akuersiinnannginneq ersarissumik takutinneqassaaq. Aapparisaq pitsaasoq nakuuserneq ajorpoq aqqutiniartuunanilu.

psychologist-name-goes-here-as-the-alt

ROSINE KREUTZMANN

Rosine 19-inik ukioqarpoq Maniitsuminngaanneerlunilu. Ullumikkut Sisimiuni najungaqarpoq 2.G-lu ingerlallugu, tamatumalu kingorna humanismemut tunngasumik ilinniagaqarusulluni. Rosinep oqaluttualiaq " " allassimavaa, taannalu oqaluttualiani katersani "Inuusuttut - Nunatsinni Nunarsuarmilu"-mik atilimmi atuarneqarsinnaalluni.