Illiunngivipputit

af: Inooqateqarnerit.gl

”Qujaniarit aapparigamma, allanimmi piumaneqanngilatit”  Ajap soqqusaatsumik oqarfigaa.

”Uangaana SMS-isiannik atuaasarnerit nuannarinngikkiga” Aaju oqarpoq.

”Taama artorsaqqajaatigisumik aappaqarusunngilanga, annaarusunngikkumma sukataartariaqalerputit!”

Ajap sms-i festimut Aviaq-mit qaaqqusissut peerpaa. Aviaq - Aajup meeraallunili nalunngisaa. Aja qungujuusarpoq fjernsynilu ikillugu. Aaju nukillaajallalluni nuannaarunnaarpoq, oqarusussuseerulluni. Arlaanik kukkussuteqarsimasoraluni eqqarsaraluarpoq – eqqaasaqaranili. Aviaq-llumi kammagiiginnarput.

Aallaqqaammut nuannersimaqaaq. Oqaloqatigiillutik illaqatigiittarsimapput takullattaarlutillu – Arlaasa angerlarsimaffianni. Kisianni taava Aja allanngorpoq. Kamassimaqqajaasarpoq, ilaannilu Aaju oqaluukkusunngivittarlugu. Aajup kukkuluttortarneri nipituumik allanut oqaluttuarisalersimavai, ilaatigullu arnanik allanik oqaloqateqaraangat assut kamattarluni.

Aqaguani Pilutaq klassimi aperivoq:

”Weekendimi Aviaq-mut festeriassavit?”
”Naluara, immaqa angerlarsimaannassaanga” Aaju akivoq
”Qaa – nuannissaqaaq. Festit nuannarisaqaatit”
”Aappi…”
”Aja aapparilerakkuli allanngornikooqaatit. Ajunngilatit?”

Aajup qimannissartik eqqarsaatigillattaartarpaa, sulili Aja nuannaralugu – inequnarlunilu nuannersinnaasarpoq, ilaatigullu aapparilluartarlutik. Aajullu maulgisarpaa Aja artorsaateqartoq. Amerlanertigut iluaqutaassasoralugu Ajamut maliguutiinnartarpoq; iluaqutaanngitsumilli.

Aajup nalunngilaa kamallunilu aliatsassasoq. Paasinnillunilu akuerissanerpaa? Ilummut anersaariarluni Aja inimiittoq iserfigaa.

Læs kommentarer

Nuannarisamut naaggaarnissaq ajornarsinnaasarpoq. Isumaqaqqajaanartarpoq maliguutiinnaraanni pissutsit iluarsiartulissasut  - nammineq pisariaqartitat aamma akigalugit. Aappariinnerli taamatut iluarsineqarsinnaanngilaq.

Ilaatigut Aja Aajumut pitsaasaraluartoq, aqunneqannginnissamut ajortumillu pineqannginnissamut Aaju pisussaaffeqarpoq. Assersuutigalugu oqarfigisinnaavaa allat tusaatillugit illaruaatigineqartarnini nuannarinagu, unitseqqullugulu. Nuannaralugu oqarfigisinnaavaa, erseqqissumilli killilerlugu. Aamma oqarfigisinnaavaa qimakkuniuk allamik aappartaarsinnaannginneraanera akuersaarneqarsinnaanngitsoq.

Qujanarpoq, Aajup kammalaataa qisuariarmat oqaluullugulu. Paasinarporlu aappariinnertik unitsikkaa, naaggaartaraluarlunilu killiliisaraluarluni pissutsit allanngunngimmat