Kina ilagigakku?

af: Rosine Kreutzmann

Naapitannguara nuannaajallarujussuarpoq pakkutaarlungalu. Meeqqat atuarfianniikkallarattali takunikuugatta kiisami naapeqqilaarnerput iluareqaarput. Oqaloqatigiinnerput alianaaqaaq, soorlu taamani inuusuttuarakasiulluta qimanngisaannarallaratta. Illoqarfiup qeqqani illaqattaareerluta ilami aliannaanngaatsiareerluta angerlamut qaninniaraluaraanga itigartippara. Angummit qaninneqarnissara nuannarinnginnakku. Paasinnittuugamili paasilluarpaanga, immitsinnullu inuulluaqqoriarluta tarrippugut. Inerput nuitsiaannaq takusinnaavara angutaatiga igalaaq ammarlugu itsuannisaartoq, aqqutigalu tamaat arajutsiumasaqanngeqaluni nakkullunga. Manngertiallappunga, qanorluunniimmi pisunnissara nalunarsiinnarpoq.

Matup ammarnissaa kajumerinngingaarlugu, ajunngisaarniaqalunga iserpunga: ‘’Halooory!’’ Igaffimmi nikorfavoq matu saaqqissaarlugu.  Vodka mikineq talerpimminik paarivaa najorsisarlunilu akoqanngitsumik. Isaata qaqortortai aappalupput, isaatalu sinai kajungaaramik qernerasaartuinnaallutik. Timera qerattaraluttuinnartoq ilutigiinnarlugu nerisassat nammattakkamiittut nillataartitsivimmut sikaavinnullu iliorarikka saninni isigiitigalunga oqalualerpoq:    

‘’Kinaana ilagigakku? Inequgisaat? Uanniit ajunnginneeq? Ilinnut naammannginnamaa? Sugassiuna illoqarfimmi? Nalunngiliuk inuit qanoq eqqarsarsassanersuut? Suutissavaanga?’’

Læs kommentarer

Arnap inuusuttup atuaqatikuni naapippaa. Inunnik allanik naapitsilluni nuannaarneq  pissusissamisoorluinnarpoq angutaappat arnaappalluunniit – ingammik qanga pisut pisuullutik. Angerlarami aappaa sangiappoq. Sangiannerata qiningasumik aqqutsiniartumillu apersuitilerpaa. Kamannermi allat misigissusaat puigorneqartarput, eqqarsaatit misigissutsillu namminerisat kisiisa sianigilerlugit. Amerlasuuni sangianneq ilumuunngitsunik eqqarsartitsilersarpoq, sangiattumut assortoruminaaqisunik. Sangiattut qanigisatik aliatsatsinnissaat, ajattortoornissaallu takusinnaaneq ajorpaat.
Arnaq inuusuttoq apersorneqannginniassagami sunngitsuusaarpoq. Pitsaanerussagaluarpoq atuaqatikuminik naapitsisimanini ammasumik eqaartortuuguniuk, pisinnaatitaaffini takutinniarlugu. Oqarfigisinnaavaa ajortumik pineqartarnerata isertortunngortikkaa, angummulli misigissusai allanngoratik.

Annakkusuummerujussuarpunga. Ilisassakka kingulliit ileriarlugit silammut sukkanissara tamaat aallariarpunga. Aapparsuarma vodkaatini suli imaqartoq iikkamut tungiinnannut miloriuppaa eqqungajavillunga. Majuartarfiit ammut aallartillualereerlugit nilliallunga arpattunga angumeraanga, nutsakkalu kisiisa tigoriarlugit qummukaallunga. Natermut inimiittumut miloriuppaanga. Susinnaajunnaarpunga. Imminut illersorumallunga talikka tamaasa atorlugit naakka asseqaniarsarivakka. Timera tamaat pigilerpaa, tarnera tamaat tiguarpaa, angussuuvoq naleqartoq pisinnaasorlu. Isimmittaasinnaanini tamaat isimmittariarlunga nikueqquaanga pisinnaanera takuteqqullugu. Naalaannarlunga nikueqqartungalu ikkamut ajappaanga toqqusassillungalu. Aammik qingakkut aalerpunga, silaralu aallarujussuarpoq. Nilliarujussuarilarluni tassanngaannaq iperarpaanga natermut torlutserujussuarlunga, ilami allaat tunneriinnanni arngalingajavippunga. Aappara nilliaatigaluni iigaq tilloriarlugu matu matorlorujussuaatigalugu anivoq.Inuusannguaq qanorsuaq iliorsinnaasaq timinni tarninnilu ilisimariigara misigaara. Kisianni naarlorujussuarneq aatsaat taamak annernartigisoq misigaara. Naakka aatsaat taamak meqqummik angitigisumik kapineqarput.

Læs kommentarer

Ajoraluartumik sangianneq/ningarneq sakkortuumik aporaatsitsilersinnaavoq. Uani angutip saassuppaa sakkortuumillu unatarlugu. Angutillu taamaaliornermini ersiginerpaasaa pisinnaavoq, tassa sangianneq nakuusernerlu kingunerisaannik qimanneqarneq. Sangianneq/ningarneq imminut nalikkitsinnermit aallaaveqakkajunnerpaasarpoq. Imminut nuannarinngikkaanni allanit nuannarineqarneq uppernarneq ajormat. Sangianneq/ningarneq annaasaqarnissamut tunngagajuttarpoq piviusunngoqqajaasarporlu sangiattoq/ningartoq ikiorneqanngikkuni. Uani nakuuserneq ima sakkortutigaaq arnap angut qimattariaqaraluaraa imminut illersorniarluni. Taavalu angutip ikiorneqarnissaanut siunnersorlugu, naggataatigullu oqaloqatigiillutik. Aappariilluni inuit allat ilassinissaat ajunngilaq, angutaappat arnaappalluunniit.

psychologist-name-goes-here-as-the-alt

ROSINE KREUTZMANN