Massakkuunngittoq

af: Sørine Steenholdt

Qanormiaasiit oqassava itigartikkukku. Aammaluunniimmi kisianni tassa peqquteqqaqqissaarlunga - soormi peqquteqanngilaaraluaruma. Piumanngiinnartungaana. Asagaluarpara, kisianni aamma paasisariaqarpaa qasusarama. Taassumatullimi ittuunngilanga, suffeqanngitsoq. Sulisarpunga, angerlarsimaffitsinnilu suliassat tamaasa kisima isumagisarlugit - saniatigullu taanna isumaginiarlugu.

Ullut qassit ilagiinneqannginnatta piffissanngulissagaluarpoq atoqateqarniaalunnissaanut. Eqiageqaarali. Nassuiaruminaatsitannik, oqaasertaleruminaatsitannillu ilaqarusussuseeruttalersunga imminut malugivunga. Qasoqqanerpunga immaqaluunniit susungaana ? Asagaluarluguli kisiannili ilaginissaanut ilaanni kajaanneq ajortunga eqqumiik. Ilaanni ilagerusunnagu itigartikkaangakku annilaangagisarpara pasitilissasoralunga allamut asannilersimasoreqinammanga imaluunniit eqqarsaleqinammat asanniffigiunnaarsimagiga.

Arfininngulersoq angerlarmat nerivugut. Usornaraluassusia taanna nukissaqartuaannartoq sunut tamanut - imaluunniit eqqortumik oqarluaannaraanni: atoqatigiinnermut. Uangaasiit nerereersimatsiaannartugut qasoqqanera malugilereerpara, erruinissaraluunniimmi eqiagingajallugulu allatulli ajornarmata uninngatiinnarsinnaannginnakkit erruivunga, naammassigamalu nalaasaarfimmut nallakarlunga fjernsynerujuulerpunga. Eqqarsaatiga: Unnuup sinnera eqqissisimaassuunga.

Læs kommentarer

Inuk-p aappami naaggarnera ataqqinngimmagu, arnap inuusuttup akitsorsaarnera paasinarpoq. Atoqatigiittoqartarpoq piumagaanni aatsaat. Arnap Inuusuttup aappani meqqatut paaqqutaraa. Angerlarsimaffimmi suliassanik ikioqatiinnerunissamik pisariaqartinini pillugu oqaloqatigisinnaavaa. Nassuiaallugulu kimigiiserneqartilluni kajungissuseeruttarluni, isumaqanngitsorlu asanagu, itigartitsininilu ataqqeqquinnarlugu. Immaqa angutip aapparmi itigartitsinera paasinerluppaa ajorineqarsoraluni. Itigartitsisinnaneq pillugu oqaloqatiittuugunik marluullutik iluaqutigissagaluarpaat.

Isugiilluta qaalersimaarujooreersugullu aarillimi ilimagisarluinnartut qaninnguulersoq malugivara. Eqqarsaatinni eqiatsangaarama, unnussuup sinnera eqqissisimaarnissaraluara isumalunnermik taarserneqareerpoq. Ilaqarusunngitsungami pinngitsaalineqassanngilanga, qasusungaana eqqissisimaarusullungalu. Oqarfigigaluarpara: Massakkuunngitsoq, qasugama. Tusaanngitsuusaarlungali piniinnarpoq, soorlu tiguartissasoralunga misileraarpasilluni. Qarasarali aalajangereersimavoq, atoqateqarusunngilanga massakkut. Takkukkuni takkukkumaarpoq, massakkulli ilaqarusussusera peqanngilaq, isumaqaraluarpungali tamanna ataqqissagaa, kisiannili naamik.

Saninnut saalluni kiisa nallakarpoq, soqutiginngitsuusaaginnartariaqarpara paasitereeraluarakkumi massakkut qasullunga. Sukakkaluttuinnarnerani eqqarsaatigilerpakka inuttut pisinnaatitaaffikka. Uanga timera. Uanga inuunera. Aappaqaraluarumaluunniit inuttut ataasiakkaatut suli inuuneqarpunga. Aappariikkaluaraanniluunniit imminut ataqqeqatigiinnissaq, imminut paaseqatigiinnissaq. Massakkullu toqqissisimananga angerlarsimavunga oqareeraluarlunga oqaatsikka soqutigineqarnatik.

Uumitsaatigalunga sapiillisaarlunga oqarfigaara: Ila qasuvunga, massakkuunngitsoq ! Tupappasilluni aappaatigullu aasimmiaasiimmik eqqarsaateqarpasilluni kiinaa isumaluummerpasiutigaluni nalaasaarfiup isuanut nallaamivoq apersulerlungalu: Sooruna ? Sugama ?

Aasiit imminut tutsikkaa, soormi imminut tunngassuteqanngilaaraluarpata. Qasoqqaannarsinnaannginnama, qasuersaalaarlungalu ? Oqareersunga piumananga sooq piniinnassavit, isumaqaravit piumassuseqanngikkaluarlunga naalaannassasunga ? Kina takugakku piumananilu ilaqartoq ? Kamaqqallunga taama suli oqaluttunga matukkut aneqaaq, matulu matorlullugu. Nalaasaarfimmut nallakarama eqqarsalerpunga, unnuk eqqissisimaarfiginiagara taamaalilluni aamma qasuerfiunngitsuulerpoq. Taamak qaqugumiaasiit angerlassava !

Læs kommentarer

Ilaatigut itigartitsiaannginnikkaanni tusaaneqanngikkaanniluunniit sakkortuumik oqartoortoqarsinnaavoq, paasineqarluarumalluni. Aapparisaq amerlanertigut tupassinnaavoq uumisulerlunilu. Atoqatigiittarnertik immitsinnullu ilimasuutik pillugit oqaloqatigiittuugunik iluaqutigissagaluarpaat. Arnap inuusuttup angerlarsimaffimmi suliassat tamaasa suliarisarpai, oqartoqarsinnaavorlu angummut anaanaasoq. Angerlarsimaffimmi oqimaaqatigiinnginnerup atoqatigiittarneq sunnersinnaavaa, aappariinnermilu oqimaaqatigiinnginneq nakuusertitseqqajaanerusarluni. Suliassanik agguataarineq misissorsinnaavaat, kiffarineqaannartutut misigerusunngikkuni. Naaggaarneq imminiunissamut pisussaaffeqarnertut isigineqarsinnaavoq. Aapparisaq pitsaasoq naaggaarnermut ataqqinnittarpoq.

psychologist-name-goes-here-as-the-alt

SøRINE STEENHOLDT